Azərbaycan və Gürcüstan bir-birinə dərin köklərlə bağlı ölkələrdir

Bakıda keçirilən İkinci Ümumdünya Mədəniyyətlərarası Dialoq Forumunda iştirak edən Gürcüstanın mədəniyyət və abidələrin mühafizəsi naziri Quram Odişariya iyunun 1-də Mədəniyyət və Turizm Nazirliyində olmuşdur.

AzərTAc xəbər verir ki, nazir Əbülfəs Qarayev ilə görüşdə iki ölkə arasında mədəniyyət sahəsində əməkdaşlığın inkişaf perspektivləri müzakirə olunmuşdur.

Əbülfəs Qarayev ölkələrimiz arasında mehriban dostluq münasibətlərindən, Gürcüstan səfərlərindən və keçirdiyi səmimi görüşlərdən məmnunluq hissi ilə danışmışdır. O, gürcüstanlı həmkarına forumda iştirakına görə təşəkkürünü bildirmişdir.

Quram Odişariya Bakı Forumunun yüksək səviyyədə təşkil edildiyini, mədəniyyətlərarası dialoqun xalqların yaxınlaşmasında mühüm rolunu vurğulamışdır. Nazir gürcü xalqının Azərbaycan xalqına və onun Prezidenti İlham Əliyevə böyük hörmət və ehtiramını diqqətə çatdırmışdır.

Görüşdə Nəriman Nərimanovun Tbilisi şəhərindəki ev-muzeyi binasının yenidən qurulmasından, Bakıda-Nizami Kino Mərkəzində tanınmış gürcü rejissoru, SSRİ xalq artisti Rezo Çxeidzenin 1965-cü ildə çəkdiyi və 2013-cü ildə müasir texnologiya ilə rəngli bərpa edilmiş "Əsgər atası" bədii filminin nümayişinin böyük maraq doğurmasından, eləcə də mədəniyyət, incəsənət sahəsində mövcud olan geniş əlaqələrdən söz açılmışdır.

Azərbaycan.-2013.- 2 iyun.- S.4.